John Mayne (1759–1836)

BY Logan’s streams that rin sae deep

Fu’ aft, wi’ glee, I’ve herded sheep,

I’ve herded sheep, or gather’d slaes,

Wi’ my dear lad, on Logan braes.

But wae’s my heart! thae days are gane,

And fu’ o’ grief I herd alane,

While my dear lad maun face his faes,

Far, far frae me and Logan braes.

Nae mair, at Logan kirk, will he,

Atween the preachings, meet wi’ me—

Meet wi’ me, or when it’s mirk,

Convoy me hame frae Logan kirk.

I weel may sing thae days are gane—

Frae kirk and fair I come alane,

While my dear lad maun face his faes,

Far, far frae me and Logan braes!

At e’en when hope amaist is gane,

I dander dowie and forlane,

Or sit beneath the trysting-tree,

Where first he spak of love to me.

O! cou’d I see thae days again,

My lover skaithless, and my ain;

Rever’d by friends, and far frae faes,

We’d live in bliss on Logan braes.